ផ្អើលស្រុកស្វាយទាប ! ចាប់ផ្សឹកសង្ឃ៥អង្គ បន្ទាប់ពីឆែកឃើញ..............
ខេត្តស្វាយរៀង ៖ មានការភ្ញាក់ផ្អើលយ៉ាងខ្លាំងដល់មហាជនដោយសង្ឃ៥អង្គគង់នៅវត្តសុវណ្ណរង្សី (ហៅវត្តពពែតថ្មី) ស្ថិតក្នុងភូមិថ្នល់កែង ឃុំពពែត ស្រុកស្វាយទាប ត្រូវបានសមត្ថកិច្ចចាប់ផ្សឹករួចឃាត់ខ្លួនវេលាម៉ោង៤ និង៣០នាទីល្ងាច ថ្ងៃទី០២ ខែកុម្ភៈ ឆ្នាំ២០១៧ ព្រមទាំងឆែកឃើញមានគ្រឿងញៀននៅក្នុងហង្សសាក់ទៀតផង ។
មន្ត្រីអាវុធហត្ថខេត្តបានឲ្យដឹងថា នៅវេលាម៉ោង៤ និង៣០នាទីល្ងាច ថ្ងៃទី០២ ខែកុម្ភៈ ឆ្នាំ២០១៧ កម្លាំងមន្ទីរយុត្តិធម៌កងរាជអាវុធហត្ថខេត្ត សហការជាមួយកម្លាំងមូលដ្ឋានកងរាជអវុធហត្ថក្រុងបាវិត និងកម្លាំងមូលដ្ឋានកងរាជអាវុធហត្ថស្រុកស្វាយទាប ដឹកនាំដោយលោកវរសេនីយ៍ឯក ស្រី វុត្ថា មេបញ្ជាការរងកងរាជអាវុធហត្ថខេត្ត និងមានការសម្របសម្រួលពីលោក គង់ ច័ន្ទរិទ្ធ ព្រះរាជអាជ្ញាអមសាលាដំបូងខេត្តស្វាយរៀង បានធ្វើប្រតិបត្តិការបង្ក្រាបករណីរក្សាទុក ឬជួញដូរដោយខុសច្បាប់នូវសាធាតុញៀន នៅចំណុចវត្តសុវណ្ណរង្សី (ហៅវត្តពពែតថ្មី) ស្ថិតក្នុងភូមិថ្នល់កែង ឃុំពពែត ស្រុកស្វាយទាប ដោយឃាត់ខ្លួនជនសង្ស័យបាន៦នាក់ ក្នុងនោះមានសង្ឃ៥អង្គ និងនៅថ្ងៃទី៣ ខែកុម្ភៈ ឆ្នាំ២០១៧ តាមចាប់បានម្នាក់ទៀតនៅភ្នំពេញ សរុបទាំងអស់៧នាក់ ។
មន្ត្រីដដែលបន្តទៀតថា ក្នុងយុទ្ធនាការបង្ក្រាបនោះក៏មានអាជ្ញាធរមូលដ្ឋាន ប្រធានមន្ទីរធម្មការសាសនាខេត្ត ព្រះចៅអធិកាវត្តតានូ ជាអនុគណស្រុកស្វាយទាប បានចូលរួមធ្វើការឆែកឆេរកុដិដែលសង្ឃទាំង៥អង្គគង់នៅ រកឃើញវត្ថុតាងគ្រឿងញៀនប្រភេទម៉ាទឹកកកចំនួន១១កញ្ចប់ ទើបសមត្ថកិច្ចធ្វើការឃាត់ខ្លួន ហើយផ្សឹកសង្ឃទាំង៥អង្គភ្លាមៗប្រគល់ឲ្យសមត្ថកិច្ចចាត់ការតាមនីតិវិធី ។
សង្ឃទាំង៥នាក់ដែលត្រូវសមត្ថកិច្ចឃាត់ខ្លួនមាន ១-ឈ្មោះ ឃឺម ថន អាយុ២៦ឆ្នាំ ជនជាតិខ្មែរ, ២-ឈ្មោះ រុន រស្មី អាយុ២៣ឆ្នាំ ជនជាតិខ្មែរ, ៣-ឈ្មោះ មុំ រ៉ាវី អាយុ២២ឆ្នាំ ជនជាតិខ្មែរ, ៤-ឈ្មោះ សូ រតនៈ អាយុ២០ឆ្នាំ ជនជាតិខ្មែរ និង ៥-ឈ្មោះ សេង ឌី អាយុ២០ឆ្នាំ ជនជាតិខ្មែរ ។ ចំណែកសង្ស័យ២នាក់ទៀតមាន ១-ឈ្មោះ មោគ សាមាន ភេទប្រុស អាយុ២៩ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅបច្ចុប្បន្នភូមិថ្នល់កែង ឃុំពពែត ស្រុកស្វាយទាប និង ២-ឃាន ឃុននី ភេទប្រុស អាយុ៤០ឆ្នាំ ជនជាតិខ្មែរ មុខរបររត់ម៉ូតូកង់បី មានទីលំនៅភូមិ១៣ ផ្លូវលេខ៤២២ សង្កាត់ទន្លេបាសាក់ ខណ្ឌចំការមន រាជធានីភ្នុំពេញ ។
ក្រោយពេលចាប់ខ្លួន សមត្ថកិច្ចរឹបអូសវត្ថុតាងរួមមាន ថ្នាំញៀនប្រភេទម្សៅក្រាមពណ៌សថ្លា(ម៉ាទឹកកក)ចំនួន១១កញ្ចប់ ស្មើទម្ងន់១៣,៥៦ក្រាម(គិតទាំងសំបកវិចខ្ចប់), ទូរសព្ច័ដៃ៩គ្រឿង, កាំបិត១, ដែកកេះ៦, សម្ភារៈសម្រាប់ប្រើប្រាស់គ្រឿងញៀនមួយចំនួន ។ បច្ចុប្បន្នជនសង្សយ័ទាំង៧នាក់ និងវត្ថុតាង ត្រូវបានកម្លាំងជំនាញមន្ទីរយុត្តិធម៌កងរាជអាវុធហត្ថខេត្ត កសាងសំណុំរឿងបញ្ជូនទៅសាលាដំបូងខេត្តស្វាយរៀង ចាត់ការតាមនីតិវិធី ហើយលោកចៅក្រមស៊ើបសួរបានចេញដីកាឃុំខ្លួនបណ្តោះអាសន្ននៅពន្ធនាគារខេត្តនៅវេលាម៉ោង៥ល្ងាច ថ្ងៃទី៤ ខែកុម្ភៈ ឆ្នាំ២០១៧ ហើយ ៕
Post a Comment